ब्रेकिंग

विदेश

पाकिस्तान-अफगाणिस्तान सीमेवर तणाव वाढला

Samruddhi Dhayagude
30 May 2025

दोन्ही बाजूंनी गोळीबार, पाककडून रणगाडे तैनात

काबूल : पाकिस्तान आणि अफगाणिस्तानातील संबंध बिघडताना दिसत आहेत. अफगाणिस्तान आणि पाकिस्तानी सैन्य यांच्यातील तणाव वाढला असून बरमाचा सीमेवर दोन्ही सैन्यांमध्ये संघर्ष पेटला आहे. दोन्ही बाजूंनी गोळीबार झाला. हा परिसर पाकिस्तानच्या बलुचिस्तान प्रांताला समांतर आहे. सीमेवर नव्या चौक्या तयार करण्यावरुन सुरु झालेला वाद विकोपाला गेला आहे. या संघर्षाबद्दल पाकिस्तान आणि अफगाणिस्तानच्या अधिकाऱ्यांनी अद्याप कोणतीही अधिकृत प्रतिक्रिया दिलेली नाही. दोन्ही सरकारकडून अधिकृत माहिती देण्यात आलेली नाही.

स्थानिक माध्यमांनी दिलेल्या वृत्तानुसार, बलुचिस्तान-हेलमंद सीमेवर जवळपास २ तास गोळीबार सुरु होता. यावेळी दोन्ही बाजूंनी लहान शस्त्रांचा वापर केला. पाकिस्तानी सैन्याने अफगाणी चौक्यांवर बॉम्ब टाकले. गोळीबारानंतर पाकिस्तानी सैन्याने नव्या चौक्यांचे काम थांबवले. डुरंड लाईनवर कोणत्याही परिस्थितीत पाकिस्तानला नव्या चौक्या उभारु देणार नसल्याची स्पष्ट भूमिका अफगाणिस्तानातील तालिबान सरकारने घेतली आहे. सीमेवरील वाढता तणाव पाहता पाकिस्तानने या भागातील सैनिकांची कुमक वाढवली आहे. या भागात अतिरिक्त फौजफाटा तैनात करण्यात आला आहे. पाकिस्तानकडून सीमेवर रणगाडेही तैनात करण्यात आले आहेत.

पाकिस्तान आणि अफगाणिस्तान यांच्यात डुरंड लाईनवरुन जुना वाद आहे. पाकिस्तान डुरंड लाईनला अफगाणिस्तानसोबतची आपली अधिकृत सीमा मानतो. पण यावर अफगाणिस्तानला आक्षेप आहे. अफगाणिस्तानमधील नागरी सरकार ते तालिबानपर्यंत कोणीही डुरंड लाईनला मान्यता देत नाही. अफगाणिस्तानात तालिबान्यांचे सरकार आल्यानंतर पाकिस्तानने सीमेवर कुंपण घालण्याचे काम वेगात सुरु केले. यामुळे दोन्ही देशांमध्ये अनेकदा संघर्ष झाला आहे. पण दोन्ही बाजू हार मानण्यास तयार नाहीत. त्यामुळे तणाव कायम आहे.

ऑगस्ट २०२१पर्यंत पाकिस्तान आणि तालिबान यांचे संबंध उत्तम होते. तालिबानला राजधानी काबूलचा ताबा मिळवून देण्यास पाकिस्तानने सहकार्य केले होते. काबूल तालिबानच्या हाती गेल्यावर पाकिस्तानात जल्लोष झाला होता. पण त्यानंतर दोन्ही देशांमध्ये बऱ्याच मुद्द्यांवरुन मतभेद झाले. त्यामुळे संबंध तणावपूर्ण बनले. सीमा प्रश्नासह टीटीपीसोबतचा पाकिस्तानचा संघर्ष, अफगाणी जमिनीवरील पाकिस्तानची सैन्य कारवाई यावरुन पाकिस्तान आणि अफगाणिस्तानचे संबंध बिघडले आहेत.